旺角抵食放題

同媽咪慶祝生日，

男朋友介紹左一間係旺角兆萬中心既日式放題餐廳比我地，

佢話呢間放題都ok，所以我就同左媽咪一齊去食。

入到去當然要睇下有咩食啦！

一般放題既刺身、壽司、手卷、沙律、燒物、天婦羅、甜品都有。

另外我地仲每人加多$50，試埋佢個「升級體驗」，

有得任叫帶子、生蠔、赤蝦刺身等等，

話哂媽咪生日，更係要同佢食得好d!

（其實係我自己想食😂😍)

叫左一陣，最快到既係我地點既一般刺身。

唔知係唔係媽咪生日所以會幸運d，三文魚係肥美既腩位，

厚厚既一片，令我食指大動。

螺肉都唔錯，鮮鮮甜甜，同埋個甜蝦都好新鮮。

「升級體驗」

跟住落黎個「升級體驗」終於黎到喇！

赤蝦刺身同帶子都好有分量！

赤蝦刺身新鮮得黎係爽口既，帶子大大粒，雪白鮮甜！

話咁快就比我同媽咪食哂。

生蠔

呢一樣我最想食既亦都係「升級體驗」入邊既生蠔喇！

生蠔上既時候店員已經好細心咁幫我地加埋醬汁，

可以就咁食就得，唔使自己加醬汁。

醬汁酸酸甜甜，同生蠔好match!好味！😋

軟殼蟹手卷

軟殼蟹手卷，我好鍾意食，因為佢又脆又香，

入邊加埋少少沙律醬，咬落去既時候，會感到非常幸福☺️

由左至右係火炙左口魚裙邊壽司、火炙三文魚壽司、鰻魚壽司同黑松露油甘魚壽司。

壽司味道都唔錯，尤其係兩件火炙壽司，燒到好香口！

炸物

食左兩round之後我地先叫炸物，因為我地兩個平時都唔太食油炸食物，但黎到食放題，點都要試下既。試過之後發覺佢都炸得幾好，特別係炸蝦天婦羅，外脆內嫩！

c+ lemon

我地兩母女都鍾意飲c+ lemon，因為可以補充一日所需既維他命C，哈哈！😂

甜品-----芒果布甸 & 櫻花水信玄餅

最後，我地叫左兩個甜品食。芒果布甸上邊有一層花奶，同布甸好match，令到布甸更加香口嫩滑。而右邊個個叫櫻花水信玄餅就比較特別！佢外型好靚，入邊真係有櫻花係度，食落去味道清新，會有少少既花香味。

同媽咪食左兩round多少少就肥左，食左好多刺身同生蠔，特別鍾意佢個帶子！媽咪都話呢間放題幾唔錯，男朋友果然冇介紹錯😂